Në Nju Jork maskat e detyrueshme që nga 13 dhjetori ndërsa Britania regjistron rekord infeksionesh që nga janari!
E përballur me një valë infeksionesh Covid-19, Guvernatori i Nju Jorkut Kathy Hochul njoftoi orët e fundit se maskat do të jenë të detyrueshme në të gjitha vendet publike brenda, me përjashtim të bizneseve apo ambienteve që kërkojnë dokumentacion vaksinimi për të hyrë.
Hochul tha se vendimi për të rivendosur kërkesën për maska u bazua në një numër në rritje të rasteve dhe shtrimeve në spital, i cili ishte veçanërisht i theksuar në pjesë të shtetit të Nju Jorkut.
Detyrimi i maskës vlen si për klientët ashtu edhe për stafin dhe do të jetë në fuqi nga data 13 dhjetor deri më 15 janar.
Në Mbretërinë e Bashkuar ndërkohë ka një rekord të infeksioneve ditore nga Covid që nga janari i kaluar: 58,194 raste të reja dhe 120 vdekje të tjera janë regjistruar, sipas të dhënave të fundit zyrtare nga autoritetet shëndetësore.
Deri më 10 dhjetor, kishte 50,867 infeksione dhe 148 vdekje. Infektimet nga varianti Omicron po rriten gjithashtu me shpejtësi: 448 raste të reja në 24 orët e fundit, duke e çuar totalin në të gjithë vendin në 1265. Dje, rritja ditore ishte 249 infeksione të reja: kjo konfirmon shpejtësinë e lartë të përhapjes së variantit që shqetëson shumë shkencëtarët britanikë.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.