“Në prill vijnë 140 mijë vaksina” – Sekretarja e Ministrisë së Shëndetësisë: Janë dërgesa nga mekanizmi COVAX
Në muajin prill pritet të mbërrijnë 140 mijë vaksina, si pjesë e mekanizmit COVAX”. Gjithçka është bërë me dije nga sekretarja e Përgjithshme, Ministria e Shëndetësisë, Gelardina Prodani, gjatë diskutimit të 2 Akteve Normative në Komisionin parlamentar të Punës, Çështjeve Sociale dhe Shëndetësisë.
Prodani u ndal dhe te 2 Aktet Normative, të cilat synojnë përshpejtimin e ardhjes së vaksinave anticovid në Shqipëri, duke përmbushur planet për vaksinimin e 2.2 mln qytetarëve në 14 muaj.
Akti i dytë Normativ parashikon autorizimin e ministrit të Shëndetësisë dhe ministrit të Shtetit për Rindërtimin për zhvillimin e negociatave me prodhuesit, me distributorë të autorizuar, me qeveritë ose institucionet e autorizuara prej tyre, të vendeve që prodhojnë ose distribuojnë vaksina anticovid, për të siguruar këto vaksina, të cilat janë të certifikuara nga trupa certifikuese në vendin e prodhimit të tyre. Ndërkohë që, akti i dytë lejon përdorimin në vendin tonë edhe të vaksinave të tjera, përveç atyre që janë autorizuar nga rregullatorët evropianë apo amerikanë të barnave.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.