Në pritje verdikti i EMA-s për vaksinën gjermane CureVac – Mbahet në frigorifer dhe lehtëson shpërndarjen në vendet më të varfra
Lista e gjatë e vaksinave anticovid tashmë pasurohet me një vaksinë të re mARN për të cilën ka pritje të mëdha. Krijuar nga një kompani e vogël gjermane, CureVac, vaksina është aktualisht në fazën 3 të provës – dhe miratimi nga Agjencia Europiane e Barnave (EMA) pritet në ditët e ardhshme. Ndryshe nga vaksinat Moderna dhe Pfizer-BioNtech, të cilat duhet të ruhen në temperatura shumë të ulëta, CureVac mund të mbahet në frigorifer (në +5 °C) për tre muaj dhe reziston 24 orë në temperaturë dhome, gjë që lehtëson shpërndarjen e saj dhe bën atë kandidatin ideal për vendet me të ardhura të ulëta.
Atëherë, pse nuk ishte CureVac i pari që zhvilloi një vaksinë efektive antiCovid, duke pasur parasysh dekada kërkimesh përpara konkurrencës? Siç ndodh shpesh, problemi kryesor ishte mungesa e investimeve: kompania e vogël gjermane nuk mund të konkurronte me gjigantët e industrisë si Pfizer, i cili u bashkua me BioNtech në 2018 dhe nuk kishte as mbështetjen e Instituteve Kombëtare të Shëndetit si Moderna, e cila gjithashtu ka qenë në gjendje të llogarisë në një miliard dollarë të vënë në dispozicion nga qeveria amerikane si pjesë e Operacionit Warp Speed, një shoqatë e krijuar me qëllim përshpejtimin e prodhimit të vaksinave antiCovid.
Në qershor të vitit 2020, mbështetja e qeverisë gjermane dhe investitorëve të tjerë lejoi CureVac të shpejtonte kohën e zhvillimit dhe në dhjetor 2020 kompania njoftoi fillimin e provave të fazës 3, të cilat përfshinin 40,000 vullnetarë në të gjithë Europën dhe Amerikën.
Tani mbetet vetëm të presim rezultatet dhe miratimin pasues të EMA, por ndërkohë, kujton Mary Warrell, një studiuese në Universitetin e Oksfordit, është më mirë të qëndrosh me këmbë në tokë dhe të mos kapesh me entuziazëm të lehtë: parashikimet gjatë kësaj pandemie shpesh kanë rezultuar të pafrytshme ”. (Focus)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.