Në rajon pa roaming – AKEP: Hapa konkrete gjatë vitit 2018
Shqipëria këtë vit do të bëjë lëvizje konkrete për të hequr tarifat e roaming me vendet e rajonit. Në strategjinë dhe planin e veprimit për vitin 2018, Autoriteti i Komunikimeve Elektronike dhe Postare parashikon të ndërmarrë hapa konkretë në drejtim të lehtësimit të heqjes së roaming-ut me vendet fqinje të Ballkanit Perëndimor.
Sipas këtij dokumenti, qasja e preferuar do të jetë nënshkrimi i marrëveshjeve dypalëshe me secilin vend.
Ky proces do të kërkojë konsultim me aktorët përkatës dhe vlerësimin e ndikimit të reduktimeve të tarifave për operatorët celularë.
Për vendet e Ballkanit Perëndimor, nënshkrimi i një marrëveshjeje për uljen graduale të tarifave ishte hapi i parë drejt objektivit për krijimin e një hapësire të përbashkët pa kosto roaming, në modelin e Bashkimit Europian.
Serbia, Maqedonia, Mali i Zi dhe Bosnja në vitin 2015 ranë dakord të ulin tarifat e roaming-ut ndërkombëtar gradualisht deri në vitin 2017, ndërsa për hapa të mëtejshme do të ketë diskutime të tjera mes vendeve.
Shqipëria nuk është bërë pjesë e kësaj marrëveshjeje, ndoshta sepse, si vend me një fluks të lartë turistësh hyrës, kjo do të dëmtonte interesat e operatorëve vendas.
Megjithatë, me nismë e AKEP duket se edhe Shqipëria do të ndjekë tendencën e përgjithshme europiane për reduktimin, deri në heqje të tarifave roaming.
Kjo do të kërkojë së pari ndryshimin e ligjit për komunikimet elektronike, me qëllim dhënien e atributeve për AKEP në rregullimin e këtyre tarifave.
Ekspertët mendojnë se krijimi i një hapësire të përbashkët pa tarifa roaming në Ballkanin Perëndimor mund të realizohet me vullnetin e të gjitha vendeve, ndërsa përfshirja në hapësirën pa tarifa roaming të Bashkimit Europian nuk do të jetë e mundur për Shqipërinë dhe vendet e tjera kandidate para anëtarësimit të plotë.
Që nga qershori i vitit të kaluar, Bashkimi Europian ndërmori një hap historik, duke eliminuar plotësisht tarifat roaming mes vendeve anëtare.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.