Në rrezik siguria globale e ushqimit – Guterres: Pushtimi rus i Ukrainës ka shtuar paqëndrueshmërinë në tregjet financiare!
Sekretari i Përgjithshëm i OKB-së, Antonio Guterres, deklaroi se problemi i sigurisë globale të ushqimit nuk mund të zgjidhet pa rikthimin në tregje të prodhimit bujqësor ukrainas dhe rus, si dhe plehrave kimike. Pushtimi rus i Ukrainës ka shtuar paqëndrueshmërinë në tregjet financiare, duke rritur çmimet e mallrave dhe ndikuar në logjistikën, si dhe penguar potencialisht rimëkëmbjen ekonomike nga COVID-19 në shumë vende.
Guterres u shpreh i vendosur të lehtësonte dialogun për të ndihmuar në arritjen e këtyre qëllimeve. Vendet në mbarë botën mund të përballen me mungesa edhe më të rënda ushqimore në vitin 2022 me krizën e vazhdueshme Rusi-Ukrainë që do të ketë ndikimin më të madh në vendet me të ardhura më të ulëta, ka paralajmëruar një raport i sapo publikuar i Kombeve të Bashkuara.
Raporti, i përgatitur nga 17 agjenci, përfshirë Programin Botëror të Ushqimit dhe Organizatën e Kombeve të Bashkuara për Ushqimin dhe Bujqësinë, mbulon situatën ushqimore të 53 vendeve në vitin 2021 dhe parashikon situatën në 2022 për 41 vende.
Sipas raportit, vitin e kaluar, 193 milionë njerëz në 53 vende ishin në rrezik të pasigurisë ushqimore, një rritje e konsiderueshme nga viti 2020, ndërsa situata globale e sigurisë ushqimore pritet të përkeqësohet në vitin 2022. Gjithashtu, raporti thekson se konflikti midis Rusisë dhe Ukrainës pritet të reduktojë më tej sigurinë globale të ushqimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.