Në “sitë” kuponi tatimor dhe borxhet e krijuara të bizneseve – Tatimet nisin operacionin e ri në periudhën Prill – Maj

Në periudhën Prill – Maj do të nisë operacioni i ri i Drejtorisë së Përgjithshme të Tatimeve për të gjithë bizneset, ku në fokus është verifikimi i zbatimit të kuponave tatimor dhe arkëtimit të borxheve të krijuara.

Drejtoria e Përgjithshme e Tatimeve, njofton se ditën e Mërkurë më datë 21 mars 2018,  ka zhvilluar mbledhjen e “Komitetit Operacional” nr.11 për “Miratimin e Planit Operacional për periudhën Prill – Maj 2018”, të Drejtorisë së Hetimit Tatimor. Ky plan është hartuar në funksion të parandalimit, zbulimit dhe ndëshkimit të evazionit fiskal dhe paligjshmërisë në fushën e tatimeve.

Zbatimi i tij do të shtrihet në të gjithë territorin e vendit, duke pasur si objekt kryesor :

-Arkëtimin e borxheve të krijuara

-Tatimpaguesit aktive që kalojnë në status pasiv, si pasojë e ndryshimit të përgjegjësisë tatimore

-Verifikimin e subjekteve për lëshimin e kuponit tatimor në vlerën reale të produktit/shërbimit krahasuar me listën e afishuar të çmimeve.

Gjithashtu në fokus të punës së Drejtorisë së Hetimit Tatimor për këtë periudhë  do të jenë edhe subjektet që janë të angazhuara në realizimin e punëve publike. Ndërsa në sektorin e ndërtimit kontrollet do të përqendrohen në verifikimin e gjendjes aktuale, si dhe në verifikimin e numrit të punonjësve.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.