Në sitën e Vetting-ut – Memçaj me pasuri modeste, pritet vendim pozitiv i “KPK”

Fatjona Memçaj është prokurorja e dytë që u paraqit përpara komisionit të Vetting-ut.  Në seancën dëgjimore të zhvilluar paraditen e së hënës , ajo u njoh me vlerësimet e Trupës Gjykuese të Komisionit të Pavarur të Kualifikimit për pasurinë, performancën profesionale dhe integritetin personal.

Prokurorja e Apelit të Tiranës rezulton se zotëron një apartament në Tiranë me sipërfaqe 96 metra katrorë në Kryeqytet, një makinë dhe një motor Vespa.  Ajo ka deklaruar gjithashtu se gjatë disa viteve familja e saj ka ndërruar disa makina, por thuajse të gjitha me vlerë afërisht 200 mijë-300 mijë lekë, dhe vetëm një mjet me vlerë 6 mijë euro. Që nga viti 2003 ajo deklaron mesatarisht rreth 2 mijë euro në vit kursime familjare nga pagat. Pasuria e saj familjare është e justifikuar nga burimet e të ardhurave dhe me shumë gjasa ajo do të marrë vlerësim pozitiv nga Komisioni i Vetting-ut për vijimin e karrierës.

Komisioni i Vetting-ut bëri me dije gjatë seancës dëgjimore se ndaj Prokurores së Apelit kanë ardhur dy ankesa nga qytetarët me inicialet VC dhe MP. Fjala e fundit e Komisionit do të thuhet më datë 3 maj, kur do jepet vendimi përfundimtar vlerësues për karrierën e Fatjona Memçaj.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.