Në T4 hotelet humbën 270 mijë netë qëndrimi – Jo vetëm të huajt, për vendasit rënia është edhe më e madhe, -64%

Shifrat e publikuara së fundmi nga Instituti i Statistikave sa i përket strukturave akomoduese tregojnë se sektori i turizmit vijon të vuajë ndjeshëm krizën e shkaktuar nga covid-19. Numri i netëve të qëndrimit nëpër struktura akomoduese regjistrohet në rënie të ndjeshme gjatë tremujorit të fundit të vitit të kaluar, me 58% krahasuar me të njëjtën periudhë të vitit paraardhës, numri i vizitorëve ndërkohë regjistrohet në rënie me 41% në terma vjetorë.

Rënie vihet re jo vetëm mes të huajve, por edhe mes vizitorëve rezident. Numri i vizitorëve vendas ka rënë me 30%, ndërkohë që numri i netëve të qëndrimit regjistrohet në rënie me 64%, tregojnë shifrat zyrtare. Mes jo-rezidentëve, rënia është me e vogël sa i përket netëve të qëndrimit, por më e lartë sa i përket numrit të vizitorëve.

Sa i përket rajoneve ndërkohë, rënien më të madhe të numrit total të vizitorëve e regjistron rajoni i veriut, me 60% në numër vizitorësh dhe me 67% në numër netësh qëndrimi. Rajoni i qendrës regjistron rënien më të ulët, sinjalizojnë shifrat. Në total, gjatë tremujorit të fundit të vitit të kaluar, janë rreth 270 mijë netë qëndrimi të humbura për strukturat akomoduese, krahasuar me të njëjtën periudhë të vitit paraardhës.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.