Në Vetting Gjyqtarja e Kurbinit – Marçela Shehu pranë konfirmimit, kalon të gjitha testet

Me shumë gjasa, Marçela Shehu, e Gjykatës së Kurbinit, do të bëhet gjyqtarja e tretë që kalon me sukses sitën e Vetting-ut. Komisioni i pavarur i Kualifikimit ka vlerësuar se ajo i përmbush të tre kriteret e vlerësimit, atë të pasurisë, të profesionalizmit dhe të integritetit personal. Në seancën dëgjimore me gjyqtaren e Kurbinit, Trupa gjykuese bëri me dije se ajo jeton në një a[apartament 100 metra katrorë në njësinë 8 në Tiranë, e cila është në proces legalizimi nga vjehrri i saj dhe i vëllai i tij. familja e saj zotëron një mjet të tipit Benz me vlerë 6 mijë euro.

Për sa i përket llogarive bankare, komisioni i Vetting-ut bëri me dije se familjarisht gjyqtarja ka një depozitë kursimesh prej 1.3 milionë lekësh dhe dy depozita për fëmijët, secila prej afro 1.3 milionë lekësh.

Për sa i përket integritetit personal dhe profesional, relatori Olsi Komici tha se ndaj Shehut kanë ardhur denoncime nga 3 qytetarë me inicialet Xh.J,  V.F dhe M.Gj. Por duket se denoncimet nuk janë konsideruar nga Komisioni si të vlefshme për të ndikuar vlerësimin profesional e integritetin e gjyqtares. Relatori Komici tha se Marçela Shehu zotëron aftësitë e duhura profesionale dhe integritetin për të vijuar punën si gjyqtare.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.