Në Vetting gjyqtarja e Kushtetueses – Vitore Tusha kalon vlerësimin e pasurisë dhe të integritetit
Të martën paradite ka qenë radha e anëtares së Gjykatës Kushtetuese Vitore Tusha të paraqitet përpara Komisionit të Pavarur të Kualifikimit, organit kryesor të Vetting-ut, për t’iu nënshtruar vlerësimit të pasurisë, profesionalizmit dhe integritetit në ushtrimin e detyrës. Sipas Relatores së çështjes Valbona Sanxhaktari, Vitore Tusha justifikon me të ardhurat familjare pasurinë e përbërë nga një apartament në Tiranë, një arë në Farkë dhe një apartament të tipit dubleks në Gjirin e Lalzit.
Sanxhaktari tha se në adresë të Vitore Tushës janë ankuar pesë qytetarë, ankesa të cilat duket se nuk kanë përbërë bazë për të ndikuar në vlerësimin profesional dhe të integritetit të Gjyqtares Kushtetuese nga Komisioni i Vetting-ut.
Në kuadrin e aftësimit profesional, Tushës i janë drejtuar dy pyetje: e para kishte të bënte me parimin e barazisë për të drejtën e mosdiskriminimin, e drejtuar nga Valbona Sanxhaktari. Dhe e dyta mbi kufizimin e lirisë, sipas Konventës Ndërkombëtare të të Drejtave të njeriut, e drejtuar nga përfaqësuesi i ONM-së, Theo Jakobs.
Në fund të seancës dëgjimore, Avokati i Vitore Tushës i kërkoi Komisionit të Vetting-ut të vlerësojë pozitivisht klienten e tij, duke qenë se nuk ka asnje element që të vërtetojë papërshtatshmërinë e saj në punën si gjykatëse.
Trupa gjykuese e Komisionit të Pavarur të Kualifikimit do të mblidhet të mërkuren paradite për të dhënë vlerësimin e përfundimtar mbi përshtashmërinë e Vitore Tushës.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.