Në Wisconsin “shpërthen” anarkia – 1 viktimë dhe disa të plagosur, pamjet tregojnë armë, zjarr dhe gjak
Tre persona janë gjuajtur me armë zjarri, dhe njëri prej tyre fatkeqësisht ka gjetur vdekjen, në natën e tretë të protestave në Kenosha, Wisconsin, në Shtetet e Bashkuara të Amerikës. Protestat e dhunshme nisën pasi policia qëlloi pas shpine me armë zjarri Jacob Blake brenda në makinën e tij, duke e lënë të paralizuar për jetë. Videot të cilat janë publikuar masivisht edhe në rrjtetet sociale tregojnë skena lufte në Wisconsin me përleshje mes civilëve me armë zjarri.
Në video, disa persona dallohet të ndjekin një tjetër person civil me armë në dorë, i cili i shtrirë në tokë gjuan pa ndalim ndaj tyre. Një tjetër video tregon një person me plagë, në dukje arme zjarri, në kokë. Të tjera video tregojnë gjithashtu persona me armë zjarri dhe të plagpsur rrugëve të Kenoshas. Jacob Blake ndërkohë, i cili u qëllua nga policia në makinën e tij, ku gjendeshin edhe tre fëmijët e mitur, ka mbetur i paralizuar dhe vijon të luftojë për jetën, thonë familjarët e tij.
Në Louisville, Kentucky ndërkohë, policia ka arrestuar 60 persona, të cilët ishin duke protestuar për vrasjen e Breonna Taylor, një grua me ngjyrë e cila u vra në mars nga forcat policore të cilët i hynë në apartament.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.