Negociatat e Brexit pranë dështimit? – Raportimet sjellin rënien e shpejtë të paundit britanik

Paundi britanik ra ndjeshëm kundër dollarit,  pas raportimeve se bisedimet për Brexit janë pranë dështimit.  Sipas burimeve të Downing Street, Kancelaria gjermane, Angela Merkel, i ka thënë Kryeministrit Boris Johnson se nuk ka shanse për arritjen e një marrëveshjeje.

Sipas raportimeve, Bashkimi Europian nuk ka treguar aspak dëshirë për dakordësi që kur Johnson dorëzoi propozimet e reja në Bruskel javën e kaluar. Paundi britanik humbi 0.6% në 1.2217 kundër dollarit amerikan, pas këtyre raportimeve.

Planet e reja të Qeverisë britanike kanë marrë reagim të vakët në kontinentin europian. Kjo është parë si java e fundit nën të cilën të dyja palët përpiqen të arrijnë një marrëveshje për Brexit, përpara daljes së datës 31 Tetor.

Propozimet e reja synojnë të trajtojnë masën “parandaluese” të Irlandës,  një politikë që siguron se nuk do të ashpërsohen kufijtë mes Irlandës dhe Irlandës së Veriut nëse Bashkimi Europian dhe Mbretëria e Bashkuar nuk bien dakord për një marrëveshje tregtare.

Propozimet e reja të qeverisë britanike kërkojnë që Irlanda e Veriut të qëndrojë në tregun e përbashkët të mallrave por të dalë nga bashkimi doganor. Qeveria bëri të ditur se kontrollet e mallrave që shkojnë nga Irlanda e Veriut në Republikën e Irlandës do të kontrollohen larg kufijve, duke hequr nevojën e infrastrukturës fizike në kufijtë brenda ishullit.

Bashkimi Europian është skeptik ndaj këtyre planeve dhe Merkel raportohet se i ka thënë Johnson në një telefonatë se Irlanda e Veriut do të duhet të qëndrojë në bashkimin doganor.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.