Negociatat për klimën në Glasgow – Bëhet thirrje për premtime më të mëdha për shkurtimin e gazrave serë
Mikpritësit britanikë të samitit të OKB mbi klimën në Glasgow, kanë propozuar se shtetet duhet të përforcojnë ambiciet për të shkurtuar emetimet e gazrave serë deri në fund të vitit 2022, në një projekt –vendim politik që vendet duhet të negociojnë në ditët e ardhshme. Propozimi vë në dukje shqetësimet e ekspertëve të klimës se ka një hendek të madh mes premtimeve aktuale të vendeve dhe përmasës që duhet të shkurtohet për të parandaluar një krizë të plotë klimatike.
Presidenti i konferencës COP26, Alok Sharma, tha se negociatorët kanë shumë punë për të bërë, që të arrijnë në një marrëveshje të mjaftueshme që trajton kërcënimet nga ngrohja globale. Drafti i parë i vendimeve politike të COP26, i publikuar këtë javë nga OKB, i bën thirrje vendeve që të “rivizitojnë dhe fuqizojnë objektivat e vitit 2030 në kontributet kombëtare, për t’u përshtatur me marrëveshjen e Parisit”.
Nën marrëveshjen e vitit 2015 në Paris, shtetet ranë dakord të limitojnë ngrohjen globale poshtë 2 gradë celsius sipër niveleve para-industriale dhe të përpiqen të vendosin një tavan në 1.5 C. Përtej këtij limiti, shkencëtarët thonë se rritja e niveleve të detit, përmbytjet, thatësirat, zjarret dhe stuhitë do të bëhen katastrofike dhe të pakthyeshme. Drafti i bën gjithashti thirrje vendeve që të heqin subvencionet në qymyr, naftë dhe gaz, duke shënjestruar kontributin kryesor të njeriut tek ndryshimi klimatik.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.