“Nënë Tereza” me rritje dyshifrore 20% më shumë fluks pasagjerësh në Tetor, ndër vendet e para në Europë
Këshilli Ndërkombëtar i Aeroporteve për Europën (ACI Europe), tregon se, aeroporti i vetëm funksional i vendit për transportin civil të pasagjerëve, ai Nënë Tereza, ka regjistruar një rritje dyshifrore të trafikut gjatë muajit Tetor.
Të dhënat thonë se rritja fiksohet në 20%, ç`ka e klasifikon Tiranën në vend të dytë të aeroporteve me rritjen më të madhe të kryeqyteteve dhe qyteteve të mëdha, përtej Bashkimit Europian. Në vend të parë është aeroporti i Kievit. Por edhe po të shohim aeroportet e mëdha të vendeve të Bashkimit Europian, ai Nënë Tereza rezulton të jetë sërish ndër vendet e para.
Rritja konstante e fluksit të pasagjerëve në aeroportin e vetëm të vendit është edhe rrjedhojë e drejtpërdrejtë e shtimit të kompanive të tjera ajrore që operojnë në dhe nga vendi. Gjatë dy viteve të fundit sidomos, një sërë kompanish ajrore prestigjioze, kryesisht low-cost, kanë filluar fluturimet nga Tirana, ose kanë njoftuar nisjen e fluturimeve. Së fundmi kanë qenë Wizz Air dhe Easyjet, kompanitë low cost që kanë zgjedhur Shqipërinë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.