BE nënshkruan paktin e mbrojtjes pas dekadash pritje – Ishte propozuar që në vitet ‘50

Franca dhe Gjermania iu afruan ambicies 70-vjeçare për integrimin e forcave europiane, teksa nënshkruan një marrëveshje së bashke me 21 qeveri të tjera europiane për financimin, zhvillimin dhe pozicionimin e forcave të armatosura.

Një pakt i tillë ishte propozuar që në vitet ’50, por kishte hasur kundërshtimin e gjatë prej Mbretërisë së Bashkuar, e cila tashmë ka vendosur të largohet nga unioni.

Ministrat e jashtëm dhe ministrat e mbrojtjes u mblodhën në ceremoninë e firmosjes në Bruksel për të përfaqësuar 23 qeveritë europiane që firmosin paktin, duke u hapur rrugën për firmë liderëve europianë në Dhjetor.

Për herë të parë këto qeveri do të jenë të detyruara ligjërisht të angazhohen në projekte të përbashkëta, si edhe do të zotohen për të shtuar shpenzimet në mbrotje, në mënyrë që të nxisin zhvillime të shpejta.

“Sot po bëjmë një hap historik. Po biem dakord mbi bashkëpunim në të ardhmen në çështje të sigurisë dhe mbrojtjes. Është vërtet një gur themeli në zhvillimin europian”, tha Ministri i Jashtëm gjerman, Sigmar Gabriel.

Hartuesit e paktit thonë se nëse do të ketë sukses, klubi zyrtar me 23 anëtarë do t’i japë Bashkimit Europian një rol më efektiv në përballimin e krizave ndërkombëtare. Kjo gjithashtu pritet të plotësojë boshllëqet, si në vitin 2011 në Libi, kur aleatët ndërkombëtare u mbështetën në Shtetet e Bashkuara për fuqi ajrore dhe municione.

Kjo nismë mbështetet edhe nga NATO, e cila synon të përfitojë nga shtimi i buxhetit për mbrojtjen, çka nënkupton fuqi ushtarake më të madhe.

Klubi do të mbështetet nga një fond mbrojtjeje prej 5 miliard eurosh, i cili do të përdoret për të blerë armë, nga një fond special për të financuar operacionet dhe nga para nga buxheti i përbashkët i BE për kërkime në mbrojtje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.