Nënshkruhet marrëveshja e bashkëpunimit mes Akademive të Policisë Shqipëri – Hungari
Në kuadër të një nisme të ndërmarrë nga OSBE-ja lidhur me bashkëpunimin e Akademive të Policisë, është nënshkruar sot marrëveshja e bashkëpunimit mes Akademisë së Sigurisë dhe Akademisë së Policisë Hungareze.
Marrëveshja u nënshkrua nga Drejtorët respektivë të Akademive, për atë Hungareze nga Kolonel Csaba BARDOCZ dhe për Akademinë e Sigurisë nga Drejtues i Lartë Bilbil MEMAJ.
Një delegacion i Akademisë së Sigurisë bëri një vizitë zyrtare në Akademinë e Policisë në Hungari me qëllim bashkëpunimin e saj me Akademitë e Policive të vendeve të tjera të Ballkanit.
Kjo marrëveshje u mundëson atyre hartimin e një programi të përbashkët trajnimi, shkëmbimin e eksperiencave të Akademive për Kurrikulat apo metodologjinë e mësimdhënies.
Po ashtu, këto Akademi do të mund të shkëmbejnë leksione të përbashkëta për të vendosur standardet e kurrikulave, si dhe shkëmbimin e përvojës së mësimdhënies. Lidhur me këtë të fundit, Pedagogët e Akademisë së Sigurisë do të mund të japin leksione në Akademinë e Policisë në Hungari dhe anasjelltas.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.