Nënshkruhet marrëveshja me Kanadanë – Përfitojnë pension 60 mijë qytetarë shqiptarë

Tashmë asnjë qytetar shqiptar që jeton dhe punon në Kanada nuk do të humbasë asnjë ditë kontribute, pavarësisht se ku ka punuar.

Falë marrëveshjes së nënshkruar ditën e djeshme në Kanada për “Mbrojtjen Shoqërore mes Shqipërisë dhe Kanadasë si edhe Rregullores Administrative” ndërmjet Ministrisë së Financave dhe Ekonomisë të Shqipërisë dhe Departamentit të Punësimit dhe Zhvillimit Social të Kanadasë është tashmë e mundur që asnjë shqiptar që ndodhet në Kanada të mos humbasë kontributet.

Në marrëveshje, për Kanadanë nënshkroi Ministrja e Punëve të Jashtme Chrystia Freeland, ndërsa për Republikën e Shqipërisë nënshkroi Ambasadori i Shqipërisë në Kanada,  Ermal Muça.
Sipas njoftimit, qëllimi i kësaj marrëveshje është shmangja e mbulimit të dyfishtë për të njëjtën periudhë dhe bashkimi i periudhave të sigurimit të realizuara në dy vendet, si dhe eksportin e pensioneve.

Shqiptarët do të kenë mundësi të marrin pensionin kanadez edhe nëse zgjedhin të jetojnë në Shqipëri, duke mos humbur asnjë të drejtë.  Nga nënshkrimi i kësaj marrëveshje do të përfitojnë rreth 60 mijë shqiptarë që jetojnë dhe punojnë në Kanada.

Që nga viti 2015 Shqipëria ka nënshkruar marrëveshje me 7 vende të Europës, dhe aktualisht ndodhet në proces negociatash dhe me 4 vende të tjera ku jetojnë dhe punojnë qytetarë shqiptar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.