Nënstacioni i ri në Kombinat – Balluku: Mbaron para afatit, furnizim më cilësor për 120 mijë abonentë

Me një financim prej 10 mln euro ka nisur puna për ndërtimin e nënstacionit të Kombinatit, duke siguruar furnizim më cilësor dhe pa ndërprerje për banorët e zonës.  Nisja e punimeve u inspektua nga ministrja e Infrastrukturës dhe Energjisë, Belinda Balluku, e cila tha se ky investim do të ulë ndjeshëm dhe humbjet e energjisë në rrjet.

“Investimi në nënstacionin e Kombinatit është një investim prej 10 milionë eurosh i financuar nga Banka Botërore. Është një financim i cili do të ndihmojë në rritjen e sigurisë përsa i përket rrjetit të tensionit të mesëm duke qenë se ky rrjet kabllor ka ndikim minimal nga kushtet atmosferike dhe si rrjedhojë numri i aksidenteve zvogëlohet minimalisht. Nga ana tjetër, ky projekt synon rritjen e standardeve të shpërndarjes së energjisë, të furnizimit me energji elektrike, sipas kodit të shpërndarjes, duke minimizuar humbjet në rrjet, humbjet teknike por edhe ndërprerjet apo defektet”, tha Balluku.

Sipas Ballukut investimi do të jetë gati në dhjetor, duke përfunduar para afatit.

“Ky projekt, siç na u premtua edhe nga drejtori i OSHEE-së, do të dorëzohet gjashtë muaj para afatit, pra do të dorëzohet në dhjetor të këtij vitit megjithëse afati i dorëzimit është parashikuar për pas 12 muajsh, pra për prillin e vitit tjetër. Kështu që do jetë edhe një projekt i suksesshëm edhe përsa i përket dorëzimit jo në kohë por dhe para kohe. Ka ndikim tek 120 mijë abonentë, sot po zëvendësojmë, dhe është diçka për tu parë dhe për t’u ruajtur, nënstacioni i vjetër që kemi është një nënstacion i vitit 48-të, nënstacion i prodhimit rus i cili ka vazhduar dhe ka funksionuar për më shumë se gjysmë shekulli por ka ardhur koha për ta zëvendësuar. Në kuadër të investimeve që Ministria e Infrastrukturës dhe Energjisë dhe OSHEE-ja vazhdojnë dhe bëjnë në rrjetin elektrik për të përmirësuar të gjitha standardet ky është një nga investimet më të fuqishme në fushë që ne do ta dorëzojmë para afatit”, u shpreh Balluku.

Nënstacioni i Kombinatit rrit cilësinë e furnizimit për 120 mijë abonentë të zonës.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.