Nëntori fillon me rritje – Nafta publikon fitime për të katërtin muaj radhazi
Çmimet e naftës prekën nivelin më të lartë që nga mesi i vitit 2015, gjatë sesionit të sotëm, pasi të dhënat publikuara treguan se, OPEC e ka respektuar marrëveshjen për uljen e prodhimit, ndërsa edhe Rusia parashikohet se e ka respektuar marrëveshjen.
Nafta Brent e Londrës po tregtohet pranë 61.5 dollarëve për fuçi, niveli më i lartë që nga korriku i vitit 2015. Ndërsa, nafta Bruto amerikane po tregtohet në rreth 55 dollarë për fuçi. Çmimet e naftës kanë fituar rreth 7% të vlerës vetëm gjatë muajit tetor, duke publikuar fitime për të katërtin muaj me radhë.
Optimizmi është mbështetur nga përpjekjen e OPEC dhe vendeve të tjera prodhuese, që kanë vendosur të ulin prodhimin me 1.8 milionë fuçi në ditë, nga janari i këtij viti, deri në mars të 2018.
Gjatë muajit tetor, prodhimi i OPEC ra me 80 mijë fuçi në ditë, në totalin e 32.78 milionë fuçive. Analistët dhe tregtarët shprehen se, edhe Rusia do ti jetë përmbajtur marrëveshjes, duke e ulur prodhimin me rreth 300 mijë fuçi në ditë, gjatë muajit të kaluar.
Ndërkohë, Arabia Saudite dhe Rusia po konsiderojnë shtyrjen e marrëveshjes për uljen e prodhimit, përtej marsit të vitit të ardhshëm. Investitorët po presin edhe të dhënat mbi prodhimin në Shtetet e Bashkuara të Amerikës, që është rritur me rreth 13%, që nga mesi i vitit 2016.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.