Nga aeroporti Vlorës te linja ajrore shqiptare! Cilat janë projektet Shqipëri-Turqi? Flet për “TV SCAN” atasheu tregtar i Turqisë në Tiranë (Intervista)

Shqipëria dhe Turqia kanë shprehur publikisht vullnetin për forcimin e bashkëpunimit ekonomik e madje në këtë kuadër janë bërë publike edhe disa projekte konkrete. Për të folur për këto projekte, në studion e emisionit “Përtëfol” ishte i ftuar Halis Kaya, atashe tregtar në Ambasadën Turke në Tiranë

Pyetje: Vetëm pak ditë më parë Turqia bëri bashkë rreth 5000 përfaqësues nga vende të ndryshme të botës në Kongresin e 22-të Botëror të Naftës, më i madhi i llojit të tij. Mes të ftuarve ishin kryeministrat e rajonit, ndër ta edhe kryeministri i Shqipërisë Edi Rama. Çfarë përfaqëson ky samit? Pse Turqia ndërmerr sot një nismë të tillë për të bërë bashkë të gjithë vendet më të fuqishme në fushën e energjetikës?

Halis Kaya: “Kongresi bën bashkë të gjithë aktorët kryesorë në industrinë e naftës, përfshirë shtete konsumatore të energjisë dhe shpërndarjes. Turqia nuk është sigurisht një prodhues i rëndësishëm i naftës dhe gazit por është një nga shtetet që luajnë një rol kryesor ndërmjet shteteve prodhuese dhe shteteve konsumatore. Turqia ka tashmë në territorin e saj linja transmetimi që transportojnë rezervat e gazit dhe naftës nga Iraku, Rusia, Turkmenistani dhe vende të tjera të cilat do të kontribuojnë në pozicionimin e saj si një vend shpërndarës i energjisë.

Në këtë kontekst, Stambolli është vendi më i përshtatshëm për të organizuar një kongres kaq të rëndësishëm.”

Cilat janë përfitimet e vendit tonë nëse anëtarësohet?

“Të jesh i pranishëm në një organizim kaq të rëndësishëm sjell padyshim avantazhe për shtetet anëtare. Shqipëria posedon burime si dhe prodhon në sasi te vogla si dhe do të jetë një shtet shpërndarës në të ardhmen e afërt.

Meqë Kongresi Botëror i Naftës bën bashkë të gjithë aktorët kryesorë në industrinë e energjisë, të jesh pjesë e një platforme ndërkombëtare kaq të madhe e bën një vend aktor në sektorin e naftës dhe gazit”

Shqipëria është tashmë pjesë e disa projekteve madhore në fushën e energjetikës. Nën dritën e Kongrësit Botëror që u zhvillua në Stamboll, cila pritet të jetë e ardhmja energjitike e rajonit?

“Me ndërtimin e projektit TAP, Shqipëria po bëhet një vend shpërndarës i energjisë së gazit. Gjithashtu TAP do të zgjatojë drejt vendeve të tjera të Ballkanit Perëndimor, duke e kthyer rajonin në një treg për konsumin e gazit. Nga ky këndvështrim të gjithë shtetet e rajonit, përfshirë Shqipërinë duhet të jenë të kujdesshme të përfshihen në një platformë të tillë.

Përgjatë punimeve të Kongresit, kryeministri Edi Rama pati mundësinë të takohej me Presidentin Erdogan, për të diskutuar për projektet të përbashkëta, mes të cilave dhe Aeroportin e Vlorës dhe për një linjë ajrore shqiptare”

Çfarë mund të na thoni më shumë rreth detajeve të këtij projekti?

“Është e nevojshme të theksojmë se lidershipi vizionar në të dy vendet ka iniciuar këtë projekt të rëndësishëm në Shqipëri. Një konsorcium i mbështetur nga tre kompani turke në fushën e ndërtimit, të cilat po ndërtojnë në Stamboll njëkohësisht aeroportin më të madh në botë, kanë vizituar Shqipërinë dhe kanë inspektuar hapësirën në Vlorë për ndërtimin e këtij aeroporti. Inxhinierë dhe ekspertë janë duke punuar në detaje për projektin dhe shpresojmë që të kenë një ofertë konkrete për qeverinë shqiptare sa më shpejt të jetë e mundur”

Një tjetër projekt i rëndësishëm do të jetë edhe krijimi i një linje ajrore.  Cili do të jetë modeli në realizimin e këtij projekti?

“Krijimi i një kompanie që do të mbajë flamurin kombëtar është një tjetër projekt i rendësishëm për Shqipërinë, i cili pritet të lidhë vendin me botën. Kompania e fluturimeve do të përfitojë mbështetje teknike dhe logjistike nga “Turkish Airlines”, kompani e cila fluturon në më shumë vende të botës krahasimisht me çdo kompani tjetër dhe që në rastin konkret do të ndaje “knoë-hoë-n” dhe ekspertizën e saj me kompaninë e re.

Një kompani fluturuese shqiptare, me flamur shqiptar…

“Kompania do të jetë një kompani totalisht shqiptare, me flamur shqiptar. Duke themeluar një kompani të tillë, qytetarët shqiptarë do të kenë mundësinë të fluturojnë drejt shumë destinacioneve duke përfituar një shërbim shumë cilësor me çmime të favorshme.

Pas përfundimit, edhe kompania shqiptare e fluturimeve do të përfitojë nga shërbimet e aeroportit të ri”

Omer Saraçi/SCAN

Intervista e plotë:

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.