Nga Londra në Luksemburg – Qendra financiare e vendit tërheq 20 firma prestigjioze në 2017 prej Brexit
Më shumë se 20 institucione të mëdha ndërkombëtare kanë zgjedhur Luksemburgun për të zhvendosur plotësisht apo një pjesë të aktivitetit të tyre gjatë vitit të kaluar.
Sipas Agjencisë së Zhvillimit Financiar në vend, kjo vjen edhe prej daljes së Britanisë nga Bashkimi Europian. Gjatë vitit 2017, 5 banka, 10 kompani ndërkombëtare të sigurimeve dhe shumë menaxherë të portofolit, kanë lajmëruar planet për t’u zhvendosur në Luksemburg apo shtuar operacionet ekzistuese, sipas agjencisë së zhvillimit të qendrës financiare në vend (LuxembourgForFinance). Ndër kompanitë që kanë bërë këto lajmërime përfshihen JPMorgan, Blackstone, RSA insurance dhe AIG.
Në total, 139 institucione financiare nga 28 vende kanë bazat në Luksemburg, që kanë zhvilluar aktivitete të lidhura kryesisht me manaxhimin e investimeve, bankingun privat dhe sektorët e biznesit dhe tregtisë. “Luksemburgu po pret lajmërime të tjera nga biznese në muajt që vijnë, qoftë në sektorin e sigurimeve, menaxhimin e fondeve, banking apo teknologjinë financiare”, shkruan agjencia.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.