Nga maji, Zvicra do të kalojë në “sitë” të gjithë pasagjerët e transportit ajror
Në përpjekje për të luftuar krimin dhe terrorizimin Zyra Federale e Policisë në Zvicër do të krijojë një njësi të re, e cila do të kalojnë në “sitë” të gjitha informacionet e pasagjerëve ajror drejt këtij vendi. Kështu Zvicra do të krijojë njësinë e quajtur “Passenger Information Unit”, që do të merret me të gjitha dhënat e pasagjerëve përmes rrugëve ajrore, dhe për personat e dyshuar do të nisë hetime.
Kjo njësi do të ketë deri në 30 ekspert nga policia federale dhe ajo kufitare. “Të dhënat përfshijnë, për shembull, emrin, detajet e kartës së kreditit dhe datat e udhëtimit”, ka deklaruar drejtori i Zyrës Federale për Policinë Nicoletta della Valle për radion SRF.
“Rreth 50 milionë të dhëna ose informacione rreth pasagjerëve të transportit ajror shkojnë brenda Zvicrës çdo vit”.
Nga fundi i majit, Zvicra do të jetë e detyruar ti japë Bashkimit Europian të gjitha të dhënat që lidhen me fluturimet që kalojnë përmes saj. Praktikë kjo e ndjekur deri më tani me Shtetet e Bashkuara të Amerikës dhe Kanadanë.
BE-ja miratoi direktivën për regjistrin e të dhënave të pasagjerëve, pas një diskutimi të gjatë në vitin 2016 dhe do të hyjë në fuqi në maj të vitit 2018. Të dhënat do të ruhen për gjashtë muaj, me qëllim që të ndalojnë sulmet terroriste dhe të ndihmojnë në luftën kundër krimeve të tjera të rënda.
Me këtë nismë Zvicra synon që të veprojë ngjashëm me SHBA-në, Kanadanë dhe vendet e BE-së, të cilat grumbullojnë dhe verifikojnë të dhënat e pasagjerëve për qëllime sigurie.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.