Nga “mini-Merkel” te “konservatori rebel”! Kë shohin mediat ndërkombëtare si favorit për zëvëndësimin e Merkel

Mediat ndërkombëtare kanë paralajmëruar prej kohësh mundësinë që Angela Merkel të dorëhiqet nga kryesimi i Partisë, duke vënë në pikëpyetje edhe një mandat tjetër të saj si Kancelare e Gjermanisë. E në këtë kontekst, nuk kanë munguar analizat e parashikimet se kush mund të jenë pasuesit e saj në krye të Partisë e në postin e kancelarit të Gjermanisë.

‘Ekspressi” britanik në artikujt e publikuar në muajt e parë të këtij viti përcaktonte si kandidaturë favorite Annegret Kramp-Karrenbauer të CDU-së, drejtuese e rajonit “Saarland” dhe që njihet me epitetin “mini Merkel”. Gazeta shkruante se “ajo shihet si zgjedhja e preferuar e Merkel për ta pasuar në detyrë, pavarësisht mungesës së eksperiencës në politikën kombëtare dhe atë ndërkombëtare.

Julia Klockner, gjithashtu nga CDU, është një tjetër që gazeta e përcakton si favorite për këtë detyrë. Në rezultatet zgjedhore jo të pritshme për partinë, kjo e fundit doli në mbështetje të Merkel duke thënë se kancelarja nuk mund të fajësohet për gjithçka. Ajo është një veterane më politikën gjermane dhe ka të ngjarë që kur të hapet gara ajo të jetë aty.

Gazeta përmend gjithashtu edhe disa kandidatë të tjerë të mundshëm për kryesimin e CDU-së, si Daniel Gunther apo ministrin ambicioz të shëndetësisë Jens Spahn.

Ndërkohë, “The Guardian” në analizat e publikuar kohët e fundit për këtë çështje vlerësonte se kandidatura favorite për të zëvëndësuar Merkelin në postin e kancelarit të Gjermanisë është në fakt ministri i Shëndetësisë Jens Spahn që e cilësojnë si “rebeli konservator” dhe një ndër kritikët e Merkel në parti.

Edhe “Bloomberg” në artikuj të mëparshëm kur analizonte zhvillimet politike në Gjermani ka vlerësuar si favoritë për të pasuar Merkelin në parti e në postin e Kancelarit Annegret Kramp-Karrenbauer dhe Jens Spahn.

Ndërkohë, “Ansa” italiane shkruan se një ndër kandidatët e gatshëm për drejtimin e CDU-së është Friedrich Merz me një karrierë të gjatë si eurodeputet dhe anëtar i Bundestagut gjerman.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.