“Nga sportelet unike për fermerët te makinat për inspektorët e AKU”. Buxheti për 2018, lista e projekteve për bujqësinë dhe sigurinë ushqimore
Ministri i Bujqësisë, Niko Peleshi, në takimin e dytë sektorial për bujqësinë me temë: “Buxheti dhe Paketa Fiskale 2018”, foli për projektet që do të investojë qeveria shqiptare vitin e ardhshëm ku u ndal te bordet e kullimit, sportelet për konsulencë ndaj fermerëve, makinat e inspektorëve të AKU, si dhe investimet për pajisjet laboratorike.
“Bashkitë tashmë janë pajisur me ekskavatorë për infrastrukturën e ujitjes dhe kullimit. Brenda programit buxhetor ne kemi bërë një draft-listë për projektet në skemat e ujitjes dhe bordet e kullimit. Vitin që vjen do të jemi gati për të vijuar me projektin e Bankës Botërore në zonën e Myzeqesë, në vlerën 25 mln eurove, në skemë janë edhe disa zona të tjera. Në total fondi për pastrimin e kanaleve ujitëse dhe kulluese është 230 mln lekë”.
Gjatë këtij takimi, ministri Peleshi deklaroi se është me rëndësi për kontrollet mbi sigurinë ushqimore, që inspektorët e AKU të pajisen me makina, por gjithashtu foli edhe për pajisjen laboratorike për kontrollet ushqimore.
“123 mln lekë nga buxheti shkojnë për të blerë 42 makina të reja për inspektorët e AKU dhe 111 mln lekë për pajisje laboratorike. Investimet për sigurinë ushqimore kapin vlerën e 375 mln lekë”, tha Peleshi.
Nga ana tjetër kreu i ministrisë së Bujqësisë foli edhe për ngritjen e sporteleve për konsulencë ndaj fermerëve.
“ 57 mln lekë do të shkojnë për 15 sportelet unike, ku numri i tyre do të jetë 20 duke llogaritur 5 sportelet që do të ngrihen brenda 100 ditëve të para të qeverisë. Këto sportele do të asistojnë për të mbushur një mungesë që ka ekzistuar në raport me fermerët, konsulencën ndaj tyre”, u shpreh Peleshi.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.