Ngadalësohen orët me 6 minuta – Konflikti Kosovë-Serbi çorodit akrepat në Europë
Në shtëpitë tona, orët digjitale, pra ato që ushqehen drejtpërdrejtë nga rryma elektrike, e që në pjesën dërrmuese janë orët e integruara në pajisjet elektroshtëpiake apo në radiot e zgjimit, gjatë kohëve të fundit janë ngadalësuar, me rreth 6 minuta. Shkaktari i këtij fenomeni të çuditshëm është konflikti Kosovë-Serbi. Arsyeja është sa banale, aq edhe komplekse.
Në Europë, frekuenca e rrymës elektrike është në 50 hertz dhe çdo anomali me këtë frekuencë, që për rrjedhojë furnizon edhe pajisjet e orëve digjitale, ka sjellë ngadalësimin e minutave.
Ka qenë vetë operatori europian i rrjeteve të transmetimit që ka njoftuar këtë, duke shtuar se nuk e ka parë diçka të tillë kurrë më parë. Rrjeti i përbashkët i energjisë mes Kosovës dhe Serbisë, bashkëngjitet me voltazhin e lartë të rrjetit europian.
Kosova së fundmi ka konsumuar më shumë energji seç ka gjeneruar dhe Sebria që është përgjegjëse për ta rregulluar diçka të tillë ka dështuar. Kjo ka bërë që frekuenca normale prej 50 hertz të ulet në 49.996 hertz, çka përkthehet në një humbje prej 113 gigavatësh, duke ngadalësuar akrepat.
Në thelb, konflikti mes dy vendeve është edhe më i gjerë. Serbët e Kosovës dhe pjesa e veriut të vendit, kryesisht Mitrovica veriore, kanë refuzuar gjithmonë ta paguajnë energjinë elektrike.
Këtë gjë e kanë bërë autoritetet kosovare deri në fund të vitit të kaluar. Pra, që prej janarit të këtij viti, veriu i Kosovës nuk e paguan energjinë elektrike.
Madje, ka zëra se, është rritur ndjeshëm aktiviteti i mining, pra prodhimit të Bitcoin në këtë pjesë të Kosovës duke shfrytëzuar energjinë elektrike falas, çka ka rritur ndjeshëm konsumin e energjisë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.