Ngadalësohet ekonomia e Britanisë – Norma më e ulët që prej 2012-ës, pjesërisht prej motit të keq

Ekonomia e Britanisë është ngadalësuar gjatë tremujorit të parë 2018, pjesërisht prej motit të ftohtë që ka sjellë  rënien e konsumit dhe aktivitetit të ndërtimit gjatë periudhës. Kjo ka ngritur dyshime mbi lëvizjen e Bankës së Anglisë në muajin e ardhshëm, për të rritur normën bazë të interesit.

Ekonomia e Britanisë u rrit me 0.1% në fillim të 2018-ës, që është norma më e ulët që prej tremujorit të katërt 2012 dhe shumë poshtë projeksioneve të analistëve.  Ngadalësimi nga norma modeste prej 0.4% e rritjes në tremujorin e katërt 2017, erdhi nga rënia e aktivitetit të ndërtimit, që ra në nivelin më të ulët në 6 vite.

Megjithatë, sipas zyrës kombëtare të Statistikave, moti i keq nuk është faktori kryesor. “Ndërkohë që moti i keq ka patur ndikim, kryesisht në ndërtim dhe shitjet me pakicë, efekti total ishte i limituar pasi është kompensuar nga rritja e ofertës së energjisë dhe shitjeve online”, deklaroi zyra e Statistikave në Londër.

Ngadalësimi i shpejtë ka gjasa të ndikojë te politikëbërësit e Bankës së Anglisë, që do të nisin javën e ardhshme bisedimet mbi rritjen e normave të interesit në takimin e 10 Majit, që do të ishte lëvizja e dytë që prej krizës financiare.  Me bazë vjetore, rritja ekonomike u ngadalësua në 1.2%, që është norma më e ngadaltë në 6 vite.

Në tremujorin e katërt 2017, Britania pati rritjen më të ulët ekonomike nga të gjithë ekonomitë e zhvilluara.  Për vitin 2018, Fondi Monetar Ndërkombëtar projektoi se Britania do të kalojë Italinë dhe Japoninë në renditje.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.