Ngadalësohet Eurozona – Aktiviteti i biznesit me ritmin më të ulët në 15 muaj
Aktiviteti i biznesit në Eurozonë ka zbehur ritimin e rritjes gjatë muajit prill tregojnë të dhënat më të fundit që vijnë nga rajoni me 19 shtete. Por, pavarësisht këtyre të dhënave, tabloja e përgjithshme mbetet pozitive.
Nga ana tjetër, të dhënat pritet që të mos kalojnë pa shkaktuar dhembje koke te politikbërësit e Bankës Qendrore Europiane, në një kohë që institucioni qendror i politikave monetare po përgatitet që të largohet nga politikat ultra-lehtësuese, si dhe në një kohë që po zhbëhen presionet inflacioniste.
Të dhënat e fundit sinjalizojnë një ulje të mëtejshme të inflacionit gjatë muajve në vijim. Kështu, indeksi PMI i Markit ra pranë nivelit më të ulët të 15 muajve të fundit gjatë Prillit, në 55.1 pikë, nga 55.2 pikë që ishte gjatë muajit Mars. Niveli i 50 pikëve ndan rritjen nga kontraktimi.
Të dhënat rezultojnë gjithashtu nën pritshmëritë e tregjeve dhe analistëve. Ekspertët shprehen se ecuria e Eurozonës është një dukuri e njohur tashmë, duke qenë se ka ndodhur edhe më parë që vrulli i fund-vitit të zbehet me hyrjen e vitit tjetër.
Indeksi Pmi sinjalizon kështu një rritje ekonomike të rajonit që ndan monedhën e përbashkët, me 0.5%-0.6% gjatë tremujorit të parë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.