Ngadalësohet Eurozona, Eurostat: Ekonomia, në rritjen më të ngadaltë në 4 vite
Ekonomia e Eurozonës u rrit me normën më të ngadaltë në 4 vite gjatë tremujorit të tretë 2018, ndërsa rritja e punësimit u ngadalësua gjithashtu, sipas të dhënave të agjencisë së statistikave të Bashkimit Europian.
Produkti i Brendshëm Bruto në zonën e valutës së përbashkët u rrit me 0.2% në periudhën Korrik-Shtator, sipas Eurostat, që konfirmoi vlerësimet fillestare.
Kjo ishte norma më e ngadaltë që prej tremujorit të katërt 2014 dhe shënoi një ngadalësim nga rritja me 0.4% në tremujorin e dytë të këtij viti. Me bazë vjetore, rritja ekonomike u regjistrua në 1.6% sipas Eurostat, që rishikoi vlerësimin fillestar prej 1.7%.
Ekonomia e Gjermanisë, më e madhja në Europë, u tkurr me 0.2% gjatë tremujorit, Franca u rrit me 0.4%, ndërsa Italia u tkurr gjithashtu me 0.1%.
Eurostat ka publikuar gjithashtu të dhënat mbi rritjen e punësimit në Eurozonë. Numri i personave të punësuar në zonën e valutës së përbashkët u rrit me 0.2% nga tremujori i dytë dhe me 1.3% me bazë vjetore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.