Ngadalësohet fuqizimi i frangës – Banka e Zvicrës ndryshon qasje, mban politikat e pandryshuara

Banka Qendrore e Zvicrës ndryshoi qasje ndaj mbivlerësimit të fortë të frangës, ndërkohë që mbajti të pandryshuar politikat lehtësuese monetare. Megjithatë, institucioni deklaroi se franga vazhdon të jetë e fortë dhe situata në tregun e këmbimit valutor mbetet e cenueshme.

Valuta, që cilësohet si një aktiv i sigurt, ka humbur tërheqjen e investitorëve gjatë javëve të fundit, ndërkohë që rimëkëmbja ekonomike në Europë ka rifituar vrull dhe rreziqet politike janë reduktuar.

Euro është rritur me gati 5% që prej fillimit të muajit Korrik, duke arritur 1.15 kundrejt frangës, duke ndihmuar eksportuesit vendas, që kanë për partner kryesor tregtar Eurozonën.

Megjithatë, ky është poshtë nivelit prej 1.20 që Banka Kombëtare e Zvicrës ka mbrojtur prej vitesh deri në Janar të 2015-ës.

Institucioni mbajti normën negative të interesit të pandryshuar dhe deklaroi se është në gatishmëri për të ndërhyrë në tregjet e valutave nëse do të jetë e nevojshme.

Banka uli projeksionet për rritjen ekonomike në 2017-ën, në 1% nga 1.5% që vlerësonte në muajin Qershor. Institucioni rriti gjithashtu projeksionet për inflacionin në 0.4% për këtë vit, krahasuar me vlerësimin e mëparshëm prej 0.3%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.