Ngadalësohet industria në Eurozonë – Prodhimi i fabrikave bie ndjeshëm në muajin Qershor

Prodhimi industrial në 19 vendet e valutës së përbashkët ra më shumë se sa pritej për muajin Qershor, ndërkohë që prodhimi i mallrave kapitale e të qëndrueshme tregoi rënie.

Zyra e Statistikave e Bashkimit Europian, Eurostat, raportoi se prodhimi në Eurozonë ra me 0.6% në muajin Qershor, pas një rritjeje me 1.2% në muajin Maj.

Megjithatë, krahasuar me të njëjtën periudhë të një viti më parë, treguesi pati një rritje me 2.6%.

Me bazë vjetore, rritja erdhi prej prodhimit të energjisë, që u zgjerua me 5.1%, mallrave të qëndrueshëm të konsumit, me 4% si dhe prej prodhimit të mallrave të ndërmjetëm, që u rrit me 3.8%.

Ndër vendet anëtare, rënia më e madhe u regjistrua në Irlandë, me 7.5%, ndjekur nga Çekia dhe Malta me 3.8% dhe 3.2% në mënyrë respektive. Edhe dy ekonomitë më të mëdha të Eurozonës, Gjermania dhe Franca, regjistruan rënie.

Prodhimi i fabrikave u rrit me normën më të lartë në Luksemburg, me 3.4%, ndjekur nga Estonia, Kroacia dhe Holanda me 1.2%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.