Ngadalësohet inflacioni në Eurozonë – Rritet me 1.4% gjatë Dhjetorit, përkeqëson situatën e BQE
Inflacioni në 19 vendet e valutës së përbashkët është ngadalësuar në Dhjetor, prej rritjes së ngadaltë të çmimeve të energjisë dhe produkteve ushqimore. Megjithatë inflacioni bazë, që përjashton këto komponentë të luhatur, mbeti i pandryshuar, sipas të dhënave të Eurostat.
Zyra e Statistikave e Bashkimit Europian, vlerësoi se çmimet e konsumit në Eurozonë janë rritur me 1.4% në muajin e fundit të vitit që kaloi, duke u ngadalësuar nga rritja me 1.5% në Nëntor.
Ky nivel pritej gjerësisht nga ekonomistët. Çmimet e energjisë u rritën me 3% me bazë vjetore gjatë Dhjetorit, në rënie nga 4.7% që u regjistrua në Nëntor. Çmimet e ushqimit të papërpunuar, u rritën me vetëm 1.9%, nga 2.4% rritje në Nëntor.
Duke hequr këto komponentë, treguesi bazë që monitorohet nga Banka Qendrore Europiane, u rrit me 1.1%, normë e pandryshuar nga Nëntori.
Institucioni në Frankfurt synon që inflacioni të arrijë pranë 2%-shit në terma afat-mesëm, dhe ka blerë tituj borxhi në tregjet dytësorë për të injektuar para në sistemin bankar, në mënyrë që të arrijë objektivin.
Në nisje të këtij muaji, banka përgjysmoi blerjet mujore të obligacioneve në 30 miliardë euro, prej fuqizimit të ekonomisë dhe rënies së papunësisë në nivelin më të ulët në 9 vite, gjë që ka ulur nevojën e stimujve të mëdhenj.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.