Ngadalësohet kreditimi në Eurozonë – Tkurren normat e rritjes gjatë muajit Dhjetor

Huadhënia ndaj kompaninë në Eurozonë u ngadalësua gjatë muajit të fundit të vitit të kaluar, ndërkohë që indikatori M3, që mat qarkullimin e parasë në rajon, pësoi rënie, tregojnë të dhënat e fundit të publikuara së fundmi.

Gjatë muajit nëntor ndërkohë, niveli i huadhënies ndaj koorporatave preku nivelin më të lartë që prej krizës financiare globale.

Dhjetori e zhbëri këtë rekord. Gjatë muajit të fundit të vitit, huadhënia ndaj biznesit u zgjerua me vetëm 2.9%, duke u ngadalësuar nga 3.1% e muajit të kaluar.

Huadhënia ndaj familjarëve ndërkohë u regjistrua në nivele të pandryshuara, në 2.8% rritje, tregojnë të dhënat e reja të Bankës Qendrore Europiane.

Trendi pozitiv është rrjedhojë e drejtpërdrejtë e politikave monetare ultra-lehtësuese të bankës.

Por, pavarësisht rimëkëmbjes gjatë dy viteve të fundit, dhe trendit mjaft pozitiv të kreditimit, si për biznesin ashtu edhe për familjen, nivelet mbeten ende shumë larg atyre të viteve përpara krizës financiare globale.

Indikatori M3 ndërkohë ra në 4.6%, nga 4.9% të muajit paraardhës, si dhe nën pritshmëritë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.