Ngadalësohet rritja e parasë në qarkullim – Vetëm 0.03% në shtator, arrin në 341.6 miliard lekë

Treguesi i parasë në qarkullim është rritur mjaft lehtë gjatë muajit shtator të këtij, viti tregojnë të dhënat më të fundit të Bankës së Shqipërisë. Ky nivel ka arritur në 341.585 mld lekë, nga 341.481 mld lekë që ishte në muajin gusht të këtij viti, në rritje me vetëm 0.03%. Përpara pandemisë, në muajiin shkurt të këtij viti, niveli i parasë në qarkullim prekte shifrën e rreth 299 mld lekëve. Injektimi në masë i parasë në sistem nga ana e Bankës së Shqipërisë për t`i bërë ballë krizës, duke ndihmuar bizneset dhe individët me likuiditet ka bërë që gjatë periudhës së krizës, niveli i parasë në qarkullim të rritet me të paktën 40 mld lekë.

Të dhënat e shtatorit sinjalizojnë një ngadalësim të hapit të injektimit të parasë në sistem nga ana e Bankës së Shqipërisë. Shifra prej 341 mld lekësh, ose rreth 2.76 mld euro të parasë në qarkullim në vendin tonë është niveli më i lartë historik. Ky indikator mat vetëm nivelin e monedhës vendase në qarkullim dhe asnjë valutë të huaj. Indikatori i parasë në qarkullim mat diferencën e parasë së emetuar nga Banka e Shqipërisë dhe sasisë së parave që gjendet akoma në arkat e institucionit, pra të gjithë sasinë e lekut shqiptar që është në qarkullim në sistem, jashtë dyerve të Bankës së Shqipërisë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.