“Ngecin” bisedimet për Brexit – Tusk: Progres i pamjaftueshëm, nuk është gati për fazën tjetër

Presidenti i Këshillit Europian, Donald Tusk, tha se nuk është bërë progres i mjafueshëm në bisedimet për Brexit, në mënyrë që negociatorët të kalojnë në fazën tjetër të diskutimeve mbi marrëdhënien e ardhshme përfshirë tregtinë.

Pas një takimi në Downing Street me Kryeministren Theresa May, Tusk tha se ka mirëpritur tonin më konstruktiv dhe realist nga Qeveria.

“Ne do të diskutojmë për marrëdhëniet e ardhshme me Mbretërinë e Bashkuar pasi të arrihet një progres.  Të dyja palët po punojnë për të, por nuk është arritur ende”, tha Donald Tusk.

Britania kërkon të tejkalojë bisedimet mbi angazhimet në buxhet me bllokun dhe çështje të tjera si statusin e ardhshëm të qytetarëve të BE që jetojnë në Britani, për të diskutuar mbi marrëdhëniet e ardhshme tregtare.

May, e cila shpresonte se i kishte kënaqur negociatorët me fjalimin në Firence javën e kaluar, tha se sipas saj, i takon Bashkimit Europian tashmë që të bëjë ofertën e radhës.

“Në fund të takimit me Donald Tusk, Kryeministrja tha se fjalimi i saj në Firence synonte përshpejtimin e bisedimeve”, deklaroi zyra e saj në Downing Street.

May tha më herët se Britania dhe Bashkimi Europian mund ta kthejnë Brexit në një histori suksesi nëse të dyja palët janë krijuese.

“Duke qenë krijues në mënyrat se si adresojmë këto çështje, ne mund të gjejmë zgjidhje që janë përfituese për të dyja palët”, tha ajo.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.