“Ngecin” matësit inteligjentë të energjisë – Rrisin cilësinë e shërbimit dhe reduktojnë lexuesit, në total janë instaluar vetëm 5760 pajisje
Instalimi i matësve inteligjentë për energjinë elektrike po ecën me ritme të ulta, ndonëse sistemi i matjes është implementuar në masën 100% në rang vendi. Sipas të dhënave zyrtare rezulton se Operatori i Sistemit të Shpërndarjes, ka instaluar në total vetëm 5760 matës inteligjentë, një pjesë e të cilëve të lidhur me konsumatorët, e disa prej tyre të lidhur me fiderat kryesorë të furnizimit në zona të caktuara.
Instalimi i tyre ndikon në rritjen dhe ruajtjen e standardeve të cilësisë së shërbimit, ndërkohë që sipas Entit Rregullator të Energjisë një nga shkaqet e kësaj situate janë investimet masive që duhet të kryhen nga ana e Operatorit të Sistemit të Shpërndarjes. Instalimi i matësve inteligjentë do të ulte shpenzimet për pagat e lexuesve të matësve, por nga ana tjetër kjo do të pasohej me rritje të numrit të të papunëve, duke qenë se aktualisht për të marrë informacion të saktë për konsumin, operatori i rrjetit duhet të dërgojë lexues të matësit në shtëpinë e konsumatorëve për të konfirmuar konsumin e energjisë çdo muaj.
Ndërkohë që, një matës inteligjent është shumë i ngjashëm me matësin tradicional në atë që mat dhe regjistron të dhënat e konsumit të energjisë. Por, matësi inteligjent ndryshon sepse është një pajisje dixhitale që mund të komunikojë nga distanca. Ai dërgon të dhëna mbi konsumin çdo 15 minuta deri në një orë dhe eleminon nevojën për një lexues të matësit.
Matësi inteligjent mund të informojë menjëherë operatorin e rrjetit nëse ka një ndërprerje të energjisë në një zonë të caktuar çka bën që operatori i rrjetit të mund të reagojë në një kohë më të shpëjtë në rikthimin e shërbimit apo korrigjimin e defektit. Më herët edhe përfaqësues të OSHEE-së kanë thënë për TV SCAN se kalimi nga matësit aktualë, në matës inteligjentë vendos një marrëdhënie më të drejtë me konsumatorët, për shkak të saktësisë në të dhëna që ofrojnë këto pajisje.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.