Ngërç për aksidentet me makinë para 1 korrikut – AMF nxjerr rregullore tranzitore. Ku do trokasin drejtuesit e mjeteve për të marrë dëmshpërblimet

Ndërsa nga 1 korriku ka hyrë në fuqi Ligji I ri për sigurimin e makinave, Autoritetit të Mbikqyrjes Financiare I duhet të gjejë një formulë për adresimin e dëmshpërblimit të aksidenteve të cilat kanë ndodhur përpara kësaj date. Zgjidhje që duket se do të vijë përmes një projektrregulloreje tranzitore që parashikon anashkalimin e këtij ngërçi, e cila është hedhur tashmë për konsultim publik.

Projektrregullorja përcakton se për të marrë dëmshpërblimet për dëmet e shkaktuara para 1 korrikut drejtuesit e mjeteve duhet të trokasin në Byronë e Sigurimeve dhe jo në kompaninë ku janë siguruar. “Të gjitha kërkesat për dëmshpërblim me datë aksidenti  përpara hyrjes në fuqi të Ligjit nr. 32/2021 “Për sigurimin e detyrueshëm në sektorin e transportit” trajtohen, paguhen dhe rimbursohen nga Byroja sipas legjislacionit në fuqi në datën e aksidentit, thekson një prej neneve të projektrregullores.

Për ngjarjet e ndodhura përpara hyrjes në fuqi të Ligjit 32/2021, nëse pala e dëmtuar I drejtohet shoqërisë së sigurimit, kjo e fundit e drejton tek Byroja, e cila regjistron kërkesën për dëmshpërblim dhe fillon procedurat e trajtimit dhe pagesës sipas legjislacionit dhe akteve rregullatore në fuqi në datën e aksidentit.

Kërkesat për dëmshpërblim të dëmeve fond kompensimi, sipas këtij neni, protokollohen dhe regjistrohen në Regjistrin Elektronik të Dëmeve Fond Kompensimi, administruar nga Byroja.

Ndërkaq, Byroja është e detyruar të trajtojë çdo kërkesë për dëmshpërblim për dëmet e parashikuara në këtë rregullore dhe të njoftojë për masën e dëmshpërblimit apo për refuzimin e kërkesës për dëmshpërblim palën e dëmtuar.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.