“Ngërçi politik dhe ekonomia” – Rama: 3 muaj luhatje nëse PD nuk hyn në zgjedhje

Ndonëse vendi është duke kaluar një situatë të vështirë politike kjo nuk është reflektuar në  zhvillimin ekonomik të vendit. Kryeministri Edi Rama i pyetur nga televizioni SCAN është shprehur se luhatje të zhvillimit ekonomik vendi do të ketë në tre muajt e ardhshëm nëse partia demokratike nuk merr pjesë në zgjedhje.

“Nuk kemi akoma shenja shqetësuese, por brenda parashikimeve tona nëse PD nuk hyn në zgjedhje, mund të kemi një fazë tremujore lëkundje, pastaj gjithçka do të jetë në normalitet. Mbajeni mënd këtë, regjistrojeni dhe në tetor mund ta përdorni sërish nëse nuk do jetë kështu”, tha Rama.

Në takimin e thirrur me gazetarët Kryeministri Rama ka zbuluar detajet e takimit me kreun e opozitës në zyrën e presidentit. Rama u shpreh se është i pa lëkundur sa i përket datës së zgjedhjeve që do të zhvillohen në 18 qershor, ndërkohë që është i hapur për bisedime me opozitën sa i përket garantimit të zgjedhjeve të ndershme.

“Si Kryeministër, patjetër që kam detyrimin që të bëj gjithçka që zgjedhjet të jenë zgjedhjet më të mira që ka bërë Shqipëria. Ne nuk kemi bërë zgjedhje si qeveri deri më sot, ne jemi këtu një qeveri e dalë nga zgjedhjet që ka organizuar Partia Demokratike në qeveri. PD ka disa kohë që ka filluar që qajë për humbjen e zgjedhjeve që nuk kanë ndodhur akoma. Ka ngritur një mal me akuza për zgjedhje që akoma nuk janë bërë”, pohoi Kryeministri.

Rama është shprehur edhe pro votimit elektronik por për në vitin 2019 pasi të përgatitet e gjithë infrastruktura e nevojshme.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.