‘Ngrijnë’ pasuritë e ish-presidentit Poroshenko – Gjykata e Kievit nis hetimin për ‘tradhti të lartë’!

Një gjykatë në Kiev urdhëroi të enjten ngrirjen e aseteve ndaj ish-presidentit ukrainas Petro Poroshenko si pjesë e një hetimi për “tradhti të lartë”, njoftoi zyra e prokurorit të përgjithshëm. Poroshenko, president nga viti 2014 në 2019 dhe tani 56 vjeç, akuzohet për lehtësimin e blerjes së qymyrit nga kompanitë në Ukrainën lindore të kontrolluara nga separatistët pro-rusë në luftë me Kievin.

“Gjykata vendosi të konfiskojë asetet e të dyshuarit”, duke përfshirë pasurinë e tij të paluajtshme dhe aksionet në kompani, tha zyra e prokurorit në një deklaratë. Poroshenko, i cili aktualisht ndodhet jashtë vendit dhe ka premtuar se do të kthehet në Ukrainë më 17 janar, nuk kishte asnjë koment të menjëhershëm për vendimin. Ish-presidenti ka mohuar në mënyrë të përsëritur çdo “tradhti” dhe ka akuzuar pasardhësin e tij, Volodymyr Zelenskyy, se qëndron pas problemeve të tij ligjore.

Para shpalljes së vendimit të enjten, Poroshenko kishte shkruar në Facebook se do të “kthehej në Kiev” për t’u paraqitur para një gjyqtari, “jo për (të mbrojtur veten), por (…) për të mbrojtur Ukrainën kundër qeverisë së tij të paaftë. ”

Konkretisht, ai dyshohet se ka ndihmuar republikat e vetëshpallura të Donetskut dhe Luganskut në Ukrainën lindore për t’i shitur qymyrin Kievit në 2014 dhe 2015 për një shumë totale prej rreth 48 milionë euro. Muajin e kaluar, ish-drejtuesi i cili aktualisht shërben si deputet në Radën e Ukrainës nuk u paraqit në pyetje në lidhje me këtë hetim.

Lufta në Ukrainën lindore, e cila filloi në vitin 2014, është një konflikt i vazhdueshëm midis ushtrisë ukrainase dhe separatistëve të mbështetur nga Rusia në rajonet Donetsk dhe Luhansk. Lufta shtatëvjeçare ka pasur rreth 14,000 viktima, ndërsa më shumë se 2 milionë ukrainas kanë kërkuar strehim ose në pjesë të tjera të vendit ose jashtë saj.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.