“Ngrirje” e qirave për 5 vite! – Berlini miraton ligjin që do të limitojë rritjen gjigante të çmimeve
Plani i Berlinit për të frenuar tregun e qirave u miratua nga deputetët, duke vendosur tavan tek të ardhurat e pronarëve të shtëpive, ç’ka mund të largojë edhe investitorët nga kryeqyteti gjerman. Ligji përmban masa si një ngrirje 5-vjeçare e qirave, që u miratua 6 muaj pas propozimit nga administrata e majtë. Këto ndryshime do të hyjnë në fuqi në fund të muajit Shkurt.
Megjithatë, partitë e opozitës kanë bërë të ditur qëllimin për ta sfiduar në gjyq. Iniciativa e propozuar nga Katrin Lompscher, shefja e zhvillimit urban dhe strehimit, synon të ulë barrën e qiramarrësve, ndërkohë që vrulli i pronave ka shkaktuar dyfishimin e qirave në dekadën e fundit. Ndërhyrjet politike kanë shqetësuar edhe investitorët, ndërkohë që fushata të tjera po përpiqen të shpronësojnë pronarë të mëdhenj si Deutsche Wohnen. “Nuk duam që Berlini të bëhet një kopje e qyteteve të shtrenjta si Londra dhe Parisi, ku njerëzit nuk mund të përballojnë dot një apartament”, tha Lompscher. Deutsche Wohnen ra në vlerë tregu me 2.1% dhe është në rënie me 13% në 12 muajt e fundit.
Unioni Kristian Demokrat i kancelares Angela Merkel, që ndodhet në opozitë në Berlin, synon ta sfidojë këtë masë në gjykatën kushtetuese të Gjermanisë. Deutsche Wohnen deklaroi se ligji nuk do të mbijetojë për shumë gjatë, por shtoi se dëmi është bërë. Analistë të tjerë thonë se veprimet e qeverisë janë një katastrofë dhe kërcënojnë një dëm të madh ndaj tregut të shtëpive dhe të gjithë Berlinit. Sipas analistëve, vlera e disa pronave në qytet mund të bjerë me mbi 40% si rezultat i ligjit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.