Ngritja e bursës së energjisë – Firmoset marrëveshja mes aksionerëve, Balluku: Konkurrencë në tregun e energjisë

Operatori i Sistemit të Transmetimit të Shqipërisë dhe ai i Kosovës kanë firmosur Marrëveshjen e Aksionarëve, duke finalizuar punën për ngritjen e Bursës Shqiptare të Energjisë. Lajmin bëri të ditur ministrja e Infrastrukturës dhe Energjisë, Belinda Balluku, përmes një postimi në rrjetin social, ku rendit edhe avantazhet që pritet të sjell ngritja e Bursës Shqiptare të Energjisë për të dyja vendet.

“ALPEX do të garantojë më shumë transparencë dhe konkurrencë në tregun e energjisë elektrike, si dhe do të ndikojë në rritjen e sigurisë së furnizimit me energji. Gjithashtu, do të inkurajojë investime të reja në gjenerimin e energjisë elektrike si dhe shfrytëzimin më efikas të burimeve ekzistuese të energjisë në të dyja vendet, Shqipëri dhe Kosovë,” është shprehur Balluku.

Sipas ministrisë, themelimi i Bursës Shqiptare të Energjisë Elektrike shënon një standard të ri të operimit në sektorin e energjisë, ndërsa vjen në përputhje me politikat për liberalizimin  e  tregut të energjisë. Për vitin 2020 Operatori i Sistemit të Transmetimit ka planifikuar një buxhet prej 62.5 mln lekësh, që do të shkojë për ngritjen e Operatorit të Tregut, ndërkohë që sipas parashikimeve ajo pritet të jetë efektive në muajin mars të vitit që vjen.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.