Ngrohja në çerdhe dhe kopshte, Beqiri: është siguruar në 41 nga 75 institucione gjithsej

Ftohja e motit dhe fillimi i reshjeve duket se nuk i ka gjetur pa përgatitur çerdhet dhe Kopshtet e kryeqytetit, shumica prej tyre falë rikonstruksioneve kanë siguruar ngrohjen dhe janë gati të presin stinën e dimrit.

Në një intervistë për televizionin SCAN drejtoresha e Qendrës Ekonomike të Zhvillimit dhe Edukimit të Fëmijëve (QEZHEF) Zhaneta Beqiri theksoi se në 41 institucione nga 75 gjithsej në kryeqytet, kaldajat janë rikthyer me naftë për të siguruar ngrohjen dhe që kjo ngrohje të jetë më cilësore.

Ndërkohë sipas drejtoreshës po punohet për ta siguruar këtë shërbim në çdo institucion.

“Vetëm gjatë vitit 2016-2017 në 75 institucione që kemi janë ndryshuar, janë rikthyer me ngrohje me naftë 41 nga këto institucione, kjo për fakti se ngrohja m naftë është më cilësore. Temperaturat optimale për zhvillimin e aktivitetit në kopësht dhe në çerdhe duhet të jenë nga 18-19 deri në 21-22 gradë. Kur pamë që këto temperatura nuk arriheshin me këtë sistem, është bërë ndryshimi i sistemit gjithashtu, për t’i paraprirë edh momenteve difektoze të kaldajave apo mospasjes së energjisë elektrike, jemi munduar me vendosjen e kondicionerëve apo mjeteve të tjera alternative”.

Sa i takon raportit fëmijë – edukator në kopshtet dhe çerdhet e Tiranës, Beqiri u shpreh se është respektuar.

Sipas drejtoreshës së Qendrës Ekonomike të Zhvillimit dhe Edukimit të Fëmijëve në çerdhet e kryeqytetit, aktualisht janë 2700 fëmijë dhe 389 edukator, çka tregon për kujdesin maksimal që i ofrohet vogëlushëve.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.