Nikolla inspekton konviktet: Projekti shtrihet në 9 godinat e Qytetit Studentit dhe më pas në të gjitha godinat e tjera
Ministrja e Arsimit, Sporteve dhe Rinisë, Lindita Nikolla, ka inspektuar punimet në konviktet e studentëve pranë ’21 Dhjetorit’.
Sipas saj, investimi për godinat e studentëve është prioritet i qeverisë, pasi janë akorduar 18 milionë euro për rehabilitimin e tyre. Aktualisht në qendrën studentore Nr.2 projekti përfshin investime në 4 godina, ku sipas Nikollës ka përfunduar rikonstruksioni për dy godina, ndërsa po punohet edhe për dy godinat e tjera.
“E kënaqur nga sa pashe, është godina e tretë nga katër godinat këtu në qendrën studentore Nr.2, që do të akomodojë studentë të inxhinierisë. Dy godina kanë përfunduar, kjo është e treta, vijojnë punimet tek e katërta. Standarde që kurrë nuk i kemi parë në godina studentore, qoftë në apartamentet ku ata do të akomodohen, po ashtu edhe me gjithçka tjetër që ka të bëjë me standardet, pra duke pasur një kuzhine të përbashkët në çdo kat, duke mundësuar sallën e studimit, internet në çdo dhomë”, tha Nikolla.
Ndërkohë, ministrja shtoi më tej se ky projekt do të shtrihet edhe në Qytetin Studenti, fillimisht në 9 godina dhe më pas në të gjitha godinat e tjera.
“Është një projekt që vijon edhe në Qytetin Studenti dhe do jetë projekti që do shtrihet fillimisht në 9 godinat e qytetit studenti dhe më pas në të gjitha godinat e tjera”- u shpreh ministrja Nikolla.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.