Nikolla: Programin për minimizimin e klasave kolektive do ta fillojmë nga Puka
Ministrat kanë prezantuar sot platformën e bashkëqeverisjes www.shqiperiaqeduam.al në qytetin e Pukës. Qytetarët janë njohur me platformën dhe funksionet që ajo përmban.
Zëvendësministrja Senida Mesi, tha se nga Puka nuk është regjistruar ende asnjë ankesë apo kërkesë në këtë platformë nga qytetarët lidhur me ndonjë problematikë konkrete.
Nëpërmjet një bashkëbisedimi me ministrat e kabinetit qeveritar, qytetarët parashtruan problematikat edhe e tyre.
Një nga qytetarët e Pukës, mësues, parashtroi dy pyetje për Ministren e Arsimit Sportit dhe Rinisë, Lindita Nikolla, lidhur me reduktimin e klasave kolektive në shkolla si dhe për mundësinë e hapjes së një shkolle profesionale në qytetin e Pukës.
Në fjalën e saj ministrja tha po punohet për një plan të përbashkët veprimi për minimizimin e klasave kolektive, i cili do të bëhet shumë shpejt publik.
“Programin tonë për minimizimin e klasave kolektive dhe do ta fillojmë si model të parë nga Puka.”
Lidhur me hapjen e një shkollë profesionale në këtë qytet, ajo u shpreh se është një diskutim që do të riadresohet së bashku me Ministrin e Finacave dhe Ekonomisë për të parë nevojat e tregut dhe sipas tyre, mund të avancohet edhe me hapjen e një shkolle profesionale në Pukë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.