Nis debati i demokratëve për 2020 – Sanders mbron planin e shpenzimeve të mëdha në shëndetësi
Konkurrenti demokrat për President, Bernie Sanders, mbrojti planin e tij të shpenzimeve të mëdha për një kujdes shëndetësor të drejtuar nga Qeveria, gjatë fazës fillestare të debatit. Megjithatë, ai pranoi se disa amerikanë do të paguajnë më shumë taksa për ta zbatuar. Gjatë natës së dytë të debateve të partisë demokratike, Sanders tha se plani i tij i shëndetësisë, Medicare-for-All, do të ulë primet për shumë persona, por disa në klasën e mesme do të duhet të paguajnë më shumë taksa.
“Njerëzit që do të përfitojnë kujdes shëndetësor nga Medicare-for-All, nuk do të kenë prime dhe asnjë shpenzim nga xhepat e tyre. Por, ata do të duhet të paguajnë më shumë taksa dhe më pak në kujdes shëndetësor,” tha Sanders.
Garuesi kryesor demokrat, Joe Biden, tha se do të tërheqë reduktimet tatimore për të pasurit që ka aplikuar presidenti Donald Trump. “Donald Trump na ka vendosur në një situatë të tmerrshme të pabarazisë në të ardhura”, tha ai. Biden, ish zv/Presidenti që po merr pjesë në garën e tretë për Shtëpinë e Bardhë dhe Sanders, senatori që dështoi në kandidaturën e vitit 2016, ishin në qendër të debatit të kësaj jave. Biden ka pasur avantazh që kur hyri në garën e demokratëve. Sanders ka qenë i dyti në sondazhi, por ka humbur së fundmi mbështetje, ndërkohë që shumë i janë kthyer konkurrentes Elizabeth Warren.
Klevis Llaha /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.