Nis detyrën në Shqipëri- Kush është ambasadori i ri i Kosovës në Tiranë
Kryetari i Kuvendit, Gramoz Ruçi, priti Ambasadorin e Kosovës, Nait Hasani, me rastin e fillimit të misionit të tij në Shqipëri. Referuar njoftimit zyrtar të Kuvendit, kryetari Ruçi e uroi Ambasadorin Hasani për fillimin e detyrës së re dhe shumë të rëndësishme.
“Të jesh Ambasador i Kosovës në Shqipëri, është një punë e lehtë, por edhe e vështirë. E lehtë sepse ne kemi mirëkuptim të plotë, por e vështirë sepse je ambasador në një pjesë të kombit tënd. Shqipëria dhe Kosova kanë një bashkëpunim vëllazëror.
Një gëzim në Prishtinë ndihet edhe në Tiranë dhe anasjelltas. Një dhimbje në Kosovë ndihet edhe në Shqipëri dhe anasjelltas.
Ne kemi pasur marrëdhënie të shkëlqyera me Kuvendin e Kosovës, z. Kadri Veseli dhe bashkëpunëtorët e tij dhe të njëjtat marrëdhënie do të kemi edhe me Kuvendin e ri dhe mezi presim konstituimin e tij. Edhe midis dy qeverive ka bashkëpunim të shkëlqyer”, vuri në dukje Kryetari i Kuvendit Gramoz Ruçi.
Ambasadori Hasani falenderoi Kryetarin Ruçi për mbështetjen e Kuvendit të Shqipërisë dhe të tijën personale për nxitjen, zgjerimin dhe fuqizimin e bashkëpunimit vëllazëror midis Shqipërisë dhe Kosovës si edhe kontributin e Kuvendit dhe qeverisë së Shqipërisë për shtimin e njohjeve ndërkombëtare të Kosovës, pranimin e saj në organizatata dhe nismat rajonale e ndërkombëtare dhe fuqizimin e rolit të Kosovës në marrëdhëniet ndërkombëtare.
Nait Hasani ka lindur në vitin 1965 në Prizren. Është ish i burgosur politik. Ai është specializuar në marrëdhënie ndërkombëtare dhe diplomaci. Hasani është ish deputet dhe është një nga nënshkruesit e Deklaratës së Pavarësisë së Kosovës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.