Nis diskutimi për votën e emigrantëve, Majko: Shqiptarët jashtë vendit të tregojnë kujdes në plotësimin e dokumenteve
“Vota e shtetasve shqiptarë jashtë vendit do ta lidhë edhe më fort të ardhmen e vendit me procesin integrim të vendit”, deklaroi ministri i Diasporës Pandeli Majko në tryezën e parë publike me temë “Votimi i shtetasve shqiptarë jashtë vendit”.
Majko deklaroi se gjithashtu përveç regjistrimit të emigrantëve, do të bëhet edhe ripërtërimi i dokumenteve të identifikimit për të gjithë shqiptarët.
“Vota e shtetasve shqiptarë jashtë vendit do ta lidhë edhe më fort të ardhmen e vendit me procesin integrim të vendit. Pas kësaj reforme elektorale do të kemi qeveri që do të mbështesin legjitimitetin e tyre edhe në votën e shtetasve të vet në perëndim. Një arsye tjetër që nxit një vendimmarrje sa më të shpejtë në Kuvendin e Shqipërisë është edhe rregullimi i regjistrimit të shtetasve jashtë vendit. Ky proces kërkon një kujdes të veçantë administrativ. Regjistrimi i shtetasve shqiptarë që jetojnë jashtë vendit kanë një rastësi pozitive i cili është plotësimi i afatit 10 vjeçar të dokumenteve të identifikimit, ato do të ripërtërihen për të gjithë shtetasit shqiptarë”.
Majko tha se shtetasit shqiptarë që jetojnë jashtë vendit duhet të tregojnë kujdes në plotësimin e dokumenteve të reja identifikuese.
“Shtetasit shqiptarë kur të aplikojnë pranë zyrave përkatëse në Shqipëri apo Konsullatat respektive të shtetit ku jetojnë për tu pajisur me njoftim elektronik apo pasaportë biometrike të shtetit shqiptar për herë të parë apo kur i ka mbaruar afati 10 vjeçar i dokumentit, apo kur i ka humbur, sipas kontratës koncensionare duhet të deklarojnë të gjithë të dhënat përfshirë dhe adresën e banimit në shtetin e huaj ku jetojnë”.
“Votimi jashtë vendit”, OSBE: S’ka rregulla ndërkombëtare, vendimi u takon autoriteteve shqiptare
Zëvendëskryetari i Prezencës së OSBE-së në Shqipëri, Robert Wilton tha se për votimin jashtë vendit nuk ekzistojnë standarde të OSBE-së apo standarde ndërkombëtare.
“Vendimi u takon autoriteteve shqiptare. Gjithsesi, është thelbësore që procesi i vendimmarrjes të jetë konsensual, gjithëpërfshirës dhe bazuar në besimin mes palëve. Është e rëndësishme të ruhet ritmi i reformës zgjedhore dhe t’u kushtohet vëmendje rekomandimeve të OSBE/ODIHR-it të bëra pas zgjedhjeve të vitit 2017, 2015 dhe 2013. Prezenca e OSBE-së mbetet e gatshme të mbështesë dhe këshillojë Shqipërinë në proceset e saj zgjedhore”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.