Nis “lufta” me Meksikën – SHBA: Tarifa të mëdha nëse nuk ndalojnë “alienët e jashtëligjshëm”

Shtëpia e Bardhë deklaroi se Shtetet e Bashkuara do të vendosin 5% tarifa në të gjithë importet meksikane nga data 10 Qershor dhe të tjera në 25% do të ndjekin në muajt e ardhshëm, nëse Meksika nuk ndërhyn për të reduktuar numrin e “alienëve të jashtëligjshëm” që hyjnë në SHBA.    Presidenti  Donald Trump i lajmëroi fillimisht tarifat në Twitter.  “Tarifat do të rriten gradualisht derisa problemi i emigrimit të jashtëligjshëm të zgjidhet”,  shkroi Trump.

Sipas të dhënave zyrtare, Meksika ka qenë vendi i dytë më i madh eksportues drejt SHBA në 2018.  SHBA kanë importuar 346.5 miliardë dollarë mallra nga Meksika në 2018, që është sa 13.6% i totalit të importeve për atë vit.   “Nëse kriza vazhdon, tarifat do rriten në 10% më 1 Korrik,  në 15% në Gusht,  20% në Shtator dhe 25% në Tetor.  Tarifat do qëndrojnë në 25% deri sa Meksika të ndalojë fluksin e jashtëligjshëm të alienëve”,  shkruhej në deklaratën e Shtëpisë së Bardhë.   Meksika është furnitori më i madh i huaj i produkteve bujqësore në SHBA, në një total prej 26 miliardë dollarë vitin e kaluar. Ndër kategoritë kryesore përfshiheshin perimet, frutat, birrë dhe verë si dhe ushqim i procesuar.

Në një letër drejtuar Donald Trump, Presidenti i Meksikës, Andres Manuel Lopez, tha se nuk kërkon përballje dhe shtoi se liderët kanë përgjegjësinë për të gjetur zgjidhje paqësore.   “Presidenti Trump: Problemet sociale nuk zgjidhjen me taksa apo masa detyruese.  Propozoj dialog dhe alternativa për problemin e emigrimit”, shkroi Andres.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.