Nis ndërtimi i banesave të dëmtuara nga tërmeti në Korçë- Balluku: ”Prioritet familjet më në nevojë”
Ka nisur puna në terren për ndërtimin e banesave në zonën e Korçës të cilat u dëmtuan pak javë më parë si pasojë e lëkundjeve të tërmetit. Në total, janë 124 banesa të cilat janë vlerësuar si të pa banueshme dhe që janë parashikuar të ndërtohen plotësisht.
Ministrja e Infrastrukturës dhe Energjisë, Belinda Balluku, së bashku me kreun e Emergjencave Civile, Haki Çako, ishin në fshatin Floq të Korçës ku njoftuan fillimin e punës për ndërtimin e 40 banesave të para.
“Të 124 shtëpitë, të cilat janë absolutisht të pabanueshme, do të ndërtohen menjëherë dhe këtu në Floq fillojmë me shtëpinë e parë. 40 nga shtëpitë në këtë zonë, të cilat janë tashmë të pabanueshme, janë marrë përsipër nga investitorët të cilët bashkëpunojnë me projektet e Ministrisë së Infrastrukturës dhe Energjisë dhe unë gjej rastin që t’i falënderoj”, u shpreh Balluku.
Ministrja e Infrastrukturës dhe Energjisë, theksoi se do të punohet paralelisht në disa kantiere, duke u dhënë përparësi familjeve të cilat kanë nevojat më të mëdha për tu sistemuar sa më parë në banesat e reja.
Nga ana e tij, kreu i Emergjencave Civile, Haki Çako sqaroi se projektet e banesave të reja janë përcaktuar në bazën e numrit të pjesëtarëve të familjes që do të banojnë në to.
Krahas fshatit Floq, paralelisht do të punohet për rindërtimin e banesave edhe në dy fshatrat e tjerë të qarkut Korçës, të cilat janë dëmtuar gjatë lëkundjeve të tërmetit të rënë disa javë më parë.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.