Nis rehabilitimi i Unazës, korsi e dedikuar për autobusët – Veliaj: Në shtator një Tiranë e transformuar

Kanë nisur ditën e hënë punimet për rehabilitimin e Unazës së Mesme me qëllim përmirësimin e sistemit të qarkullimit për automjetet dhe shtimin e korsive për biçikleta.

Kryetari i Bashkise, Erion Veliaj, ka inspektuar punimet pranë njësisë Nr. 7 dhe u shpreh se kantieri i hapur sjell për kryeqytetin një revolucion në mënyrën e transportit publik.

“Kantieri që është hapur sot është një kantier fantastik sepse sjell një revolucion në mënyrën e transportit publik në Tiranë. Duke filluar nga Brryli, te Ministria e Jashtme e deri te “Vasil Shanto”, pjesa e korsisë së lumit të Lanës do të jetë e dedikuar për biçikleta, ndërsa pjesa tjetër për transportin publik dhe makinat private. Autobusi do të ketë korsi të dedikuar në ato pjesë të Unazës ku zakonisht ka edhe trafikun më të madh ose ka edhe më shumë semaforë. Duke bërë këto ndërhyrje, inkurajojmë një transport alternativ”, tha Veliaj.

Sipas Veliaj do të punohet intensivisht në periudhën e verës për të përfunduar investimin para se qytetarët të kthehen nga pushimet.

“I kemi dhënë një ritëm të jashtëzakonshëm punëve në Tiranë. Po shfrytëzojmë maksimalisht korrikun, gushtin, kur Tirana është pak më e lirshme, duke qenë se njerëzit ikin me pushime, që bashkia të jetë në krye të detyrës dhe punët që mund të ishin bërë në mars e në prill, të cilat u vonuan prej shirave, t’i kompaktojmë gjatë periudhës së pushimeve, që kur qytetarët të kthehen në shtator të gjejnë një Tiranë totalisht të transformuar”, tha Veliaj.

Investimi parashikon ndërhyrjen në disa segmente të Unazës për përmirësimin e qarkullimit të automjeteve në disa kryqëzime, duke realizuar një korsi të dedikuar për biçikleta përgjatë bulevardit ”Zhan D’Ark” dhe bulevardit ”Gjergj Fishta”, si dhe duke riasfaltuar segmentet e amortizuara të Unazës së Mesme.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.