Nis rimbursimi i fishave – 1500 fëmijë përfitojnë nga fondi prej 40.9 mln lekë
Nis rimbursimi i fishave për diabetikët. Nga fondi 40.9 milionë lekë do të përfitojnë rreth 1500 fëmijë të moshës nga 0-18 vjeç. Ministrja e Shëndetësisë dhe e Mbrojtjes Sociale Ogerta Manastirliu u shpreh nga QSUT se rimbursimi i fishave për fëmijët ulë kostot e sëmundjes për familjarët.
“Të gjithë fëmijët diabetikë përfitojnë tashmë falas fishat e diabetit, duke i kursyer buxheteve familjare 1.2 milion lekë të vjetra në vit. Do të rimbursohen falas 4 fisha në ditë por kemi menduar për procedurë sa më lehtësuese për marrjen e tyre, në mënyrë që pacientët mos të vijnë të gjithë në Tiranë, por të kenë mundësi ti marrin pranë vendbanimeve të tyre”.
Bashkim Bakiu është prindi i një fëmije me diabet. Me rimbursimin e fishave atij do ti kursehen rreth 10 mijë lekë në muaj.
“Në emër të të gjithë prindërve të fëmijëve me diabet, falënderoj Qeverinë dhe Ministrinë e Shëndetësisë që na e mundësoi më në fund këtë kërkesë tonën sepse ishte pagesë e lartë, e papërballueshme për ne”.
Të gjithë pacientët fëmijë që përfitojnë nga rimbursimi i fishave në të gjithë vendin duhet që të drejtohen tek mjeku i familjes. Do të jetë ky i fundit që pasi të shkruaj recetën do t’i drejtojë në farmacitë e spitalit të rrethit përkatës për të përfituar fishat e rimbursuara.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.